त्रिभुवन विश्वविद्यालय कानून संकायको नवनिर्मित भवनको उदघाटन त्रिभुवन विश्वविद्यालयका उपकुलपति प्रा.डा दिपक अर्यालले गर्नुभएको छ । बल्खुहाइट स्थित कानून संकायको उक्त भवन रु ५ करोड ३६ लाख २३ हजार २२४ रुँपैया लागतमा निर्माण भएको हो । ६ वटा स÷साना भूकम्प प्रतिरोधी भवन निमार्ण गरी विगत १३ महिनादेखि कानुन डीन कार्यालयले आफना शैक्षिक एवम् प्रशासनिक क्रियाकलाप सञ्चालन गर्दै आइरहेको छ । भवनको उदघाटन कार्यक्रममा त्रिभुवन विश्वविद्यालयका उपकुलपति प्रा.डा दिपक अर्यालले सवै अध्ययन संस्थान एवम् संकायहरुको आफनो छुट्टै कार्यालय निमार्ण गर्ने बताउनुभयो । उहाँ कानूनको शिक्षाको विकासका लागि महत्वपूर्ण भूमिका निर्वाह गर्ने सम्पूर्ण पूर्वज प्राध्यापकहरुको स्मरण गर्नुहुँदै देशको कानूनी शिक्षा थप गुणस्तरिय र प्रभावकारी हुनुपर्ने बताउनुभयो । कानुनको महत्व र यसक्षेत्रको गरिमाका बारेमा आफू लामो समयदेखि परिचित रहँदै आएको उल्लेख गर्नुहँदै उपकुलपति अर्यालले विश्वविद्यालयको नियमानुसार कानून शिक्षाको विकास र उन्नयनका लागि सहयोग गर्ने प्रतिवद्धता समेत व्यक्त गर्नुभएको थियो ।

कार्यक्रममा कानून संकायका डिन प्रा.डा कृष्णप्रसाद बस्यालले कानुनी शिक्षाको ऐतिहासिक पृष्ठभूमिका बारेमा बताउनुहुँदै वि.स १९६२ मा श्रेस्ता पाठशाला बाट नेपालमा कानूनी शिक्षाको औपचारिक प्रारम्भ भएको र वि.स २०११ सालमा नेपाल ल कलेजको स्थापना भई त्रिभुवन विश्वविद्यालमा वि.स २०१६ मा गाभिएको जानकारी गराउनुभएको थियो । त्रिभुवन विश्वविद्यालयको आंगिक क्याम्पसको रुपमा रहेको नेपाल ल क्याम्पसमा विस २०३० बाट कानूनमा प्रमाणपत्र, २०४२ बाट कानुनमा स्नातक, र २०५४ बाट स्नातकोत्तर अध्ययन शुरुवात भएकोमा हाल प्रमाणपत्र तह खारेज भई स्नातक तहमा १ हजार ८ सय विद्यार्थी, स्नातकोत्तर तहमा २७० र विद्यावारिधि तहमा ६२ जना शोधार्थीहरु अध्ययनरत रहेको जानकारी गराउँनुभएको थियो । १३४ जना दरवन्दी रहेको कानून संकायमा हाल जम्मा ३६ जना स्थायी शिक्षकहरु रहेकोले अध्ययन/ अध्यापन कार्य निकै कठिनाई र चुनौतीपूर्ण रहेको जानकारी गराउनुहँदै कानून संकायका डीन प्रा.डा बस्यालले यथाशक्य शिक्षकहरुको उपलब्ध गराउने परिस्थित निर्माणमा सहयोग गरिदिनुहुन उपकुलपति समक्ष विशेष अनुरोध गर्नुभएको थियो । कार्यक्रममा पूर्व डीनहरु प्रा.डा ताराप्रसाद सापकोटा र प्रा.डा बिजयसिंह सिजापतिलाई सम्मान समेत गरिएको थियो ।